ഇന്ത്യയിൽ 5ജി വരാൻ ഇനി വലിയ കാലതാമസം ഉണ്ടാകില്ല. വൈകാതെ തന്നെ സ്വകാര്യ ടെലിക്കോം കമ്പനികളായ റിലയൻസ് ജിയോ, എയർടെൽ, വിഐ എന്നിവ 5ജി നെറ്റ്വർക്ക് വാണിജ്യാടിസ്ഥാനത്തിൽ ലഭ്യമാക്കി തുടങ്ങും. 5ജി നെറ്റ്വർക്ക് ഇന്ത്യയിൽ (5G In India) സജീവമായാൽ 4ജി നെറ്റ്വർക്കിന് എന്തുപറ്റുമെന്ന് ആലോചിച്ചിട്ടുണ്ടോ?. 5ജി വരുന്നതോടെ 4ജിയുടെ വേഗത കുറയുമോ അതോ കൂടുമോ?. കൂടാനാണ് സാധ്യതയെന്നാണ് ടെക് വിദഗ്ധർ പറയുന്നത്. ഇതിന് ചില കാരണങ്ങളും അവർ ചൂണ്ടികാട്ടുന്നുണ്ട്. എങ്ങനെയാണ് 5ജി വന്നാൽ 4ജിയുടെ വേഗത വർധിക്കുന്നത് എന്ന് നോക്കാം
ഇന്ത്യയിൽ ഏറ്റവും കൂടുതൽ വരിക്കാരുള്ള ടെലിക്കോം കമ്പനിയാണ് റിലയൻസ് ജിയോ. അതുകൊണ്ട് തന്നെ മികച്ച സ്പെക്ട്രം സംവിധാനങ്ങളും വലിയ 4ജി നെറ്റ്വർക്കും ജിയോക്ക് ഉണ്ട്. ഇത്രയൊക്കെ ഉണ്ടെങ്കിലും ജിയോയുടെയും മറ്റ് ടെലിക്കോം കമ്പനികളുടെയും ഉപയോക്താക്കൾക്ക് നെറ്റ്വർക്ക് പ്രശ്നങ്ങൾ ഉണ്ടാകാറുണ്ട്. ധാരാളം ആളുകൾ നെറ്റ്വർക്ക് ഉപയോഗിക്കുമ്പോഴാണ് ഇത് ഉണ്ടാകുന്നത്. ഓരോ നെറ്റ്വർക്കിന്റെയും കപ്പാസിറ്റി നിശ്ചിത എണ്ണം ആളുകൾക്ക് സേവനം നൽകുന്നത് മാത്രമായിരിക്കും എപ്പോഴെങ്കിലുമൊക്കെ ഇതിൽ കൂടുതൽ ആളുകൾ ആ നെറ്റ്വർക്കിലേക്ക് വന്നാൽ നെറ്റ്വർക്കിൽ പ്രശ്നങ്ങൾ ഉണ്ടാകും.
നെറ്റ്വർക്കിലെ ഓവർലോഡ് കാരണമുള്ള പ്രശ്നങ്ങൾ ഇല്ലാതാകാൻ ആ പ്രദേശത്തെ ആൾക്കൂട്ടമോ തിരക്കോ ഇല്ലാതായാൽ മതി. 5ജി വരുന്നതിലൂടെ വലിയൊരു ശതമാനം 4ജി നെറ്റ്വർക്ക് ഉപയോക്താക്കളും 5ജിയിലേക്ക് മാറുന്നു. അതുകൊണ്ട് തന്നെ 4ജി നെറ്റ്വർക്ക് കൂടുതൽ മികച്ച രീതിയിൽ ലഭിക്കും. തിരക്കുകളില്ലാത്ത നെറ്റ്വർക്കിൽ നിന്നും വേഗതയേറിയ ഇന്റർനെറ്റും ലഭിക്കും. ഇതാണ് 5ജി വന്നാൽ 4ജിക്ക് വേഗത കൂടുമെന്ന് പറയാനുള്ള ഒരു കാരണം.
ഇന്ത്യയിൽ 5ജി എസ്എ (സ്റ്റാൻഡ് എലോൺ) സേവനം നൽകുന്ന ഒരേയൊരു ഓപ്പറേറ്റർ ജിയോയാണ്. ജിയോയുടെ 5ജി എസ്എയ്ക്ക് നിലനിൽക്കാൻ 4ജി നെറ്റ്വർക്കിന്റെ സഹായം ആവശ്യമില്ല. എന്നാൽ മറ്റ് ഓപ്പറേറ്റർമാർ നൽകുന്ന 5ജി എൻഎസ്എയിൽ (നോൺ സ്റ്റാൻഡ് എലോൺ) 4ജി നെറ്റ്വർക്കിന്റെ സഹായത്തോട് കൂടിയാണ് 5ജി നെറ്റ്വർക്ക് പ്രവർത്തിക്കുന്നത്. ജിയോയുടെ കൂടുതൽ ഉപയോക്താക്കൾ 5ജിയിലേക്ക് പോയാൽ ബാക്കിയുള്ളവർക്ക് 4ജിയിൽ തന്നെ മികച്ച ഡാറ്റ വേഗത ലഭിക്കും.
5ജി എൻഎസ്എയുടെ കാര്യത്തിലും ഇതിൽ വലിയ വ്യത്യാസമൊന്നും ഇല്ല. ഒരു 4ജി കോറിന്റെ സഹായത്തിലാണ് 5ജി എൻഎസ്എ പ്രവർത്തിക്കുന്നത്. എന്നാലും 5ജി സ്പെക്ട്രം വേറെ തന്നെയാണ്. അതുകൊണ്ട് തന്നെ 4ജി ഉപയോഗിക്കുന്ന ആളുകളുടെ എണ്ണം കുറയുമ്പോൾ നെറ്റ്വർക്കിൽ കൂടുതൽ വേഗത കിട്ടാൻ സാധ്യതയുണ്ട്. എന്തായാലും 5ജി നെറ്റ്വർക്ക് ഇന്ത്യയിൽ സജീവമാകുന്നതോടെ രാജ്യത്തെ 4ജി നെറ്റ്വർക്കിന്റെ വേഗത വളരെയേറെ വർധിക്കും. അടുത്ത മാസത്തോടെ തിരഞ്ഞെടുത്ത നഗരങ്ങളിൽ 5ജി ലഭ്യമായി തുടങ്ങുമെന്നാണ് സൂചനകൾ. ആദ്യഘട്ടം ആരംഭിക്കാനുള്ള സ്പെക്ട്രം എല്ലാ സ്വകാര്യ ടെലിക്കോം ഓപ്പറേറ്റർമാരും സ്വന്തമാക്കായിട്ടുണ്ട്.
