കാസർകോട്: കാസർകോട് കുമ്പള അനന്തപുരം ക്ഷേത്രത്തിലെ അത്ഭുത മുതല ബബിയ യാത്രയായി.ഞായറാഴ്ച രാത്രിയിലാണ് 75 വയസ്സുള്ള മുതലയുടെ മരണം സംഭവിച്ചത്. കുമ്പള അനന്തപുരം അനന്തപത്മനാഭസ്വാമി ക്ഷേത്രത്തിലെ സസ്യാഹാരിയായ ബബിയ എന്ന മുതല ഭക്തര്‍ക്ക് അത്ഭുതമായിരുന്നു.
തിരുവനന്തപുരം പത്മനാഭസ്വാമിക്ഷേത്രത്തിന്റെ മൂലക്ഷേത്രം ആണ് കുമ്പളയിലെ ഈ ക്ഷേത്രം. ഇന്ത്യയിലെ ഏക തടാക ക്ഷേത്രം കൂടിയാണിത്. 1945ല്‍ ക്ഷേത്രത്തിലുണ്ടായിരുന്ന ഒരു മുതലയെ ബ്രിട്ടീഷ് സൈനികന്‍ വെടിവച്ചു കൊന്നതായി പറയപ്പെടുന്നു. ദിവസങ്ങള്‍ക്കുള്ളില്‍ ബബിയ ക്ഷേത്രക്കുളത്തില്‍ പ്രത്യക്ഷപ്പെട്ടെന്നുമാണ് വിശ്വാസം. രാവിലെയും ഉച്ചയ്ക്കുമുള്ള പൂജകള്‍ക്കുശേഷം നല്‍കുന്ന നിവേദ്യമാണ് ബബിയയുടെ ആഹാരം. മുതലയ്ക്കു നിവേദ്യം ഇവിടെ പ്രധാന വഴിപാടാണ്. ഇഷ്ടകാര്യ സാധ്യത്തിനാണ് ഭക്തര്‍ വഴിപാട് നടത്താറുളളത്.
നിവേദ്യം പൂജാരി കുളത്തിലെത്തി ബബിയക്ക് കൊടുക്കും. പൂജാരിയുടെ വിളികേട്ട് അനുസരണയോടെ എത്തുന്ന മുതല ഏവർക്കും വിസ്മയമായിരുന്നു. കുളത്തിലെ മറ്റ് ജീവജാലങ്ങളെയും മല്‍സ്യങ്ങളെയും ബബിയ ഉപദ്രവിക്കാറില്ല. നേരത്തെ മുതല മരണപ്പെട്ടതായി സോഷ്യൽ മീഡിയയിൽ വ്യാജമായ പ്രചരണമുണ്ടായിരുന്നു. ബബിയയുടെ വീഡിയോയും ചിത്രങ്ങളും പല തവണ സമൂഹമാധ്യമങ്ങളിൽ വൈറലായിരുന്നു.
